الرئيسية » أهالي المعتقلين » كل يوم والمعتقلين بقلوبنا … وأهلهم بعيونا

كل يوم والمعتقلين بقلوبنا … وأهلهم بعيونا

Picture2#عيد_المعتقلين #عيدهم_في_السجن
يمكن كتيرين منا بيشوفوا انو ما منقدر نعمل شيء للمعتقلين بشكل مباشر ، بس يلي نحن متأكدين منو انو بنقدر نخلي المعتقلين رضيانين علينا ونردلهم جزء من تضحياتهم كرمالنا …. عم تسألوني كيف ؟
ما في شيء بيهون على المعتقل وبينسيه عذاب الأيام يلي راحت إلا لما يلاقي الأمانة يلي تركها النا ما ضاعت .
ما في شيء بيهون على المعتقل وبينسيه عذاب السجن إلا لما والدتو تخبروا أنو والله رفقاتك ما نسيونا ، ضلوا يسألو عنا ويطمنوا علينا.
ما في شيء بيهون على المعتقل وبينسيه عذاب السجن قد اللحظة يلي بتخبروا فيها زوجتو وولادوا انو الناس من اقارب واصدقاء ما تركونا نحتاج شيء بغيابك .

أهالي المعتقلين أمانة عنا … لا تتركوهم وحدهم بالمعاناة ، ولا تتركوهم يدوروا عليكم لتساعدوهم ، وأساسا عفة نفسهم ما بتسمحلهم يعملوها.

انتو بتعرفوهم … انتو فيكون تدوروا عليهم وتساعدوهم باحسان … انتو فيكون تتذكروهم وتوقفوا جنبهم .

لا بقى حدا يقول ما منقدر نعمل شيء للمعتقلين … نحن بنقدر كلنا بنقدر ، وكلنا مطلوب منا انو نعمل شيء .. وكل واحد حسب استطاعته .
اتصال بالتلفون وسؤال.
زيارة لأسرة معتقل ، وما عاد حدا زارهم من بعد غيابو.
عيدية لابن المعتقل.
أضحية لعيلة المعتقل.
صدقة على نية الافراج عن معتقلكم.
وكتير .. كتير … وأنتو أهل نخوة واحسان وما بدو من يقلكم شيء الله يبارك فيكم .


#صوت_المعتقلين
كل يوم وأنتو سند لأهالي المعتقلين … كل يوم وانسانيتنا صامدة بوجه الطغاة ومحاولاتهم لزرع الخوف فينا ورفع الحواجز بينا وبين أهالينا.
كل يوم وانسانيتنا عم تزهر حب وعطاء لأسر المعتقلين ولبعضنا البعض.
كل يوم والأمل برجعة الأحباب عم يضوي حياتكم ، والصبر زينة أوقاتكم ورفيقكم.
شاركنا رأيك بالتعليق
الوسوم:
السابق:
التالي:

عن صوت المعتقلين

شاركنا رأيك

لأعلي